Akad. Kopi Kyçyku,
President i Shoqërisë Kulturore Shqiptare
Haemus,
Kavalier i Shën Silvestrit Papë
Në Muzeun Memoriali i Dhimbjes, (Memorialul Durerii) Sighet, Rumani |
Ftesa historike
dhe pjesëmarrja e kreut të Kishës Ortodokse, Patriarkut Bartolomeu, në
ceremoninë e fronëzimit në Vatikan të Papës Françesk I, nuk vonoi të pasohej
nga një ngjarje tjetër, gjithaq e rëndësishme: nënshkrim i dekretit për
beatifikimin Monsinjorit Vladimir Gjika, mistik i shquar, filozof i fesë, i
martirizuar në burgjet komuniste të Rumanisë më 16 maj 1954.
Një ndër
detyrat thelbësore, që i caktoi vetes qysh në ditën e themelimit të saj,
Shoqëria Kulturore Shqiptare Haemus, me seli qendrore në Bukuresht, ishte dhe
mbetet qëmtimi, hulumtimi, vlerësimi dhe popullarizimi i personaliteteve të
shquara me prejardhje shqiptare, në të gjitha fushat e veprimtarisë njerëzore.
Një nga këto
figura është Monsinjori Vladimir Gjika, pinjoll i një familjeje famëmadhe, nga
gjiri i së cilës kanë dalë personalitete të shquara, ndër të cilët sundimtari
Grigor Gjika, diplomati dhe ish-kryeministri Ion Gjika (1816-1897),
intelektualja e përmasave evropiane Elena Gjika (1828-1888), alias Dora
D’Istria, princi Albert Gjika (1868-1925), drejtues i një kongresi
mbarëshqiptar dhe nismëtar qysh më 1905 i një projekti për shqyrtimin e
mundësive të shpalljes së pavarësisë së Shqipërinë, etj.
Pas një pune të
gjatë këmbëngulëse dhe sistematike, doktori i shkencave Ardian-Christian Kyçyku
përgatiti një numur të madh materialesh, një pjesë e të cilave nisi të botohej
qysh nga janari i vitit 2007 në organe të ndryshme shtypi në Rumani, Shqipëri ,
Kosovë e Mërgatë, dhe u paraqit në simpoziume shkencore në Evropën Perëndimore,
si, fjala vjen, në Tubimin Ndërkombëtar „Evropa. Ëndrra dhe trauma”, mbajtur në
Kështjellën Seggau, pranë qytetit Leibniz (Austri), më 24-26 maj 2007, me
pjesëmarrjen e një numuri të madh personalitetesh të shkencës e të politikës
botërore, mes të cilëve Presidenti i atëhershëm i Parlamentit Evropian,
Hans-Gert Poettering, Komisarja Evropiane Benita Ferrero-Waldner, Peshkopët
Josef Homeyer dhe Egon Kapellari, mendimtari Jeremy Rifkin, tre nga rektorët e
Universitetit të Graz-it etj.